兩句《起底組》嘅觀後感（輕劇透）
-
好欣賞導演喺離場前嘅一句說話：係讚係鬧，都希望大家多啲分享，要支持本土電影。因為就算係鬧，都好過無人知道套戲嘅存在，香港嘅作品已經去到呢個地步。
-
電影搶攻年輕人市場，搶攻到一個點係中年或老一輩嘅人根本無辦法理解到電影投放嘅心思，因為佢哋唔會J Rose Ma，未見過一拳超人，唔會知咩係火影跑，甚至未必知道有個討論區叫高登。
-
啱啱好坐喺我隔離嘅係兩個伯伯，目測佢哋大概瞓咗半場，我估電影大抵起唔到兩代人溝通嘅作用，因為《起底組》入面運用咗大量網絡文化嘅符號，或者流行嘢嘅icon，游學修跳「咩菇咩菇fire」，識得笑，其實好好笑，但我估伯伯個腦入面從來未出現過「初音」呢兩隻字。
-
以上所講嘅，都唔係問題，因為《起底組》target嘅係年輕人，我講老人家睇唔明係挑骨頭。但電影喺講故事上的確有需要改善嘅地方。例如林耀聲同游學修呢對孖兄弟，由執唔到錢，到化身正義嘅鍵盤戰士，當中心理描寫頗為不足，由[自己拎唔到著數]->[起底搞人]->[真心為公義而戰]嘅心理變化轉折點喺邊?呢part應該要重點寫，亦係年青人覺醒嘅過程。
-
而成套《起底組》比我有頗強[捉到鹿但脫唔到角]嘅感覺，講網絡文化可以有驚天動地嘅可能性，甚至顛覆電影語言，例如今年嘅《人肉搜尋》，勁到不得了。但《起底組》捉到呢個題材嘅可拍之處，但無深入去寫故事，結局仲要嚟一個溫情姊妹情做結尾，既保守，又討好唔到受眾年輕人，算兩頭唔到岸。
-
又例如成套電影寫警察同高登仔嘅競賽，亦係可發揮嘅地方，高登仔用新一代嘅思維，揪得贏做事陳舊古板嘅香港警察，做事守舊嘅盲點喺邊呢？新一代隨咗電腦技術之外，有咩個人之處呢？呢啲情節上嘅處理，並唔應該係禁個KEYBOARD制就起曬你底。
-
水能覆舟，亦能載舟，網絡可以令高登仔做正義使者，但同時可以令你賭錢輸死，網購成癮，其實好多大橋上嘅處理，都睇到編導嘅心思，但執行上過於零碎。
-
好似喪鬧，但更多嘅係愛之深，責之切，2003年開始我就上高登，轉眼間已經十五年，電影喺呈現網絡文化上的確功不可沒。游學修同林耀聲嘅演出亦絕對令人眼前一亮，小動作，對白，微表情全部都諗過度過，演得好出色，我甚至認為《起底組》係前者從影而嚟最佳演出，香港後生男演員，又添兩位實力派。
-
如果你未知道，其實11月1號有套香港人先睇得明嘅本土電影，佢叫《起底組》。
—
起底組 Keyboard Warriors
Search